كتبت : فيفيان فخري
هى ظاهرة اجتماعية سلبية موجوده فى مختلف المجتمعات وتنشأ بسبب خلل فى العلاقة الطبيعية التى تربط بين الأزواج ومن الأسباب التى تؤدى إلى الخيانة عدم التكافؤ الزوجى واختلاف العمر وانعدام الثقة بين الزوجين وغياب أحد الزوجين.
كل من المرأة والرجل دائما يبحثان عن الكمال فى كل شئ وهذا أمر مستحيل أن تجد كل شئ فى شخص واحد ومن هنا لابد من التجريب مع آخر وأخرى حتى لو كانت بوسائل غير مشروعة ..فالمرأة دائما تبحث عن الأمان لأنها لا تشعر بالحب إلا لو حست بالأمان، الأمان هو اللى بيأتى بالحب وبيبقاله معنى مختلف، لكن الحب مش بالضرورة يجيب إحساس بالأمان!الأنثى عايزة تكون مع راجل يحسسها بالأمان، حد بيحبها وهيفضل يحبها طول العمر ، عمره ما يكدب عليها ، عمره ما يقولها حاجة محصلتش ، عمره ما يخبى عليها سر ، عمره ما يخليها تصحى من النوم خايفة ومقبوضة ومش عارفة ايه اللى ممكن يحصل بكره.انت ممكن تبقى فى علاقة مع شخص بتحبه بس طول الوقت قلقان ومتوتر وخايف وجوده مش مطمنك ولا مخلى روحك تهدا .
اى شخص فى الدنيا قادر يمنحك الحب لكن نادراً لما تلاقى شخص يحسسك بالأمان..ويخلى كل أيامك تمر بهدوء وقلبك يكون مطمن وهادى ، مش حاسس بأى توتر من العلاقة دى ، محدش يستحق إنه يبقى فى علاقه بيصحى من النوم وهو مقبوض بسببها من غير ما يعرف ليه ولا يعرف ايه اللى هيحصل فيها.
اما الرجل الذى يبحث عن الخيانة محتاج يشعر انه لسه مرغوب فيه ومحبوب ولسه حر مفيش عليه قيود ودايما عايز اللى مش مضمون علشان يحس بروح المغامره وان العلاقة شيقه.
فى الزواج مفيش كل ده لانه هو كمان ما بيبقاش كدا مع الست اللى متجوزها ..هو خلاص كون بيت ومعاه ست تشوف طلباته ورغباته فيرجع تانى بقى يشوف حياته اللى كانت قبل الزواج…فى هذه الحاله هل خيانة الرجل فى حق المرأة ؟ الاجابه لا….لان الزواج ميثاق بيعقد على سنة الله ورسوله فلما يرتكب ذنب ايا كان فهو فى علاقة الشخص مع ربنا..إذاً ده حق من حقوق الله كونك مسلم لازم تصون حقوق الله وتراعي ربنا فى نعمه عليك ان وهبلك بيت وزوجة وأسرة.
الراجل لما بيخون الست بتزعل وبيحصل مشكلة كبيرة وليه يكون عند الراجل فكرة اصلا انه يخون ..وده طبعا بعض الرجاله مش كلهم علشان مفيش تربية على أسس ومبادئ الزواج فى الإسلام.
وهذا بيكون عن طريق تعارف اسرتين ووجود ميثاق غليظ بينك انت وزوجتك ..ومعنى أنت أو انتى وافقت على الزواج دا مطلوب منك الإخلاص وانك تقوم بواجبك كزوج او زوجه وان زى ما ليك حقوق عليك واجبات..وان انت بتكون أسرة مسلمه ولازم تكون مسئول عنهم مسئوليه تامه فى تربيتهم وتعليمهم ومصاريفهم وتعاليم دينهم كل دا محدش قاله ..
ولا اظن ابدا ان يكون هناك أب يجلس مع ابنه ويفهمه ويقوله فى حاجة غلط فى الزواج منتشره بين بعض الرجال وهيا الخيانة الزوجيه وان دا حرام وده حق من حقوق ربنا عليك وممكن محدش يعرف وربنا يسترك بس ده ذنب كبير عند ربنا.
فبيطلع الولد أو البنت مش فاهمين اصلا يعنى ايه تكوين اسره فى الإسلام..فطبيعي فى ناس تخون وفى أزواج متستحملش فكرة الخيانة وبيوت تهدم لعدم معرفة اسس الحياة السليمة.
